|
|
Eerohpeeivi vyesi ruávgá, kiehâ kokká, mäihli kolgá, pessi njala já suávvil kođá.
Jis čuánjá uáinoo ovdil válburpeeivi, te ij tälvi innig pište kuhháá.
Saturnus merkkâ almenäähkist tiätá nievrisšooŋâ ton peeivi, mon puotâ tot lii.
Puško vuoivâs vorrâsuonâ kovvee keesi lavtâsvuođâ. Jis suonâ lii kossuv,
te arva ennuv, jis lii seggi teikâ ij ollágin, te lii koške keesi. Jis ovddiikeččin lii kossâ suonâ já moonjiikeččin seggi, te algâkeesi láá arveh já loppâkeesi lii koškes.
Jis niävdá varjâgâšâid, te šadda korrâ tavepieggâ.
Piegâkoozah čäittih, kost kulij itten piäggá.
Jis peeivi alne lii poccee, šadda purgâ.
Jis piäivâš kistâkkist, te šooŋah muttojeh.
Jis suovâpoccest páštá pajaskulij čuhâ čuovâ tego passeem, šadda purgâ.
Jis tälviv väärih čuávjájeh kukken, te lii itten piivvâl.
Jis ehidist peivi maŋŋaalsis páštá, te lii itten arve.
Jis kárbá maajeeld láá kublâkkâsah, te tot tiätá arve.
Jis kähtee rááhu, te šadda nievrisšoŋŋâ.
Áigu arvađ, ko miähástâh meehist.
Áigu muáttáđ, ko piävâš lii kälddest.
Tääsniluččim tiätá myettee.
Jis kissá uáđá njune pajaskulij, šadda nievrisšoŋŋâ.
Kuus kulij poccuuh joteh, tobbeen kulij piegâškuát itten.
Jis riävskáh muorâoovsijn išteh, tot tiätá myettee.
Jis äijihšoŋŋâ mana tavas, te čuáskid.
Jis kiehâ kovlo, te tibi arvaa.
Jis kiehâ puáhčánâd, te čuáskid.
Jis suovâ mana vyelligâsân, te šadda nievrisšoŋŋâ.
Jis máánu pirrâ lii kiärdu, te áigu purgiđ.
Poccuuh čuáskudeh ovdil nievrisšooŋâ.
Jis pelji saŋŋeed, te áigu muáttáđ.
Jis piijpo šnjiirijd, te áigu arvađ.
Ko riävskáh skeikkih, te šadda nievrisšoŋŋâ.
Ko taavtijd luáddu, te šadda korrâ pieggâ.
Ko uáivi saŋŋeed, te piegâškuát.
Jis puásui puolâšin tuárgist, te áigu pivâldiđ.
Ko puásui čala, te áigu pivâldiđ.
Matti Morottaja
|
|
