Ella Sarre lii šoddâm Avelist suáđi ääigi ive 1943 Sammeli Antti Sare (Anttii-Mat Saammâl) já Saara-Maria Sare s. Saijets perrui. Pärnivuođâs Ella vietij Kesvuonâst Nuorttâ-Anarist. Tááláá ääigi Ella Sarre áásá já parga Aanaar Njellimist.

Ella Sarre lii ohtâ toin haarvijn anarâštyeje mättein. Sun lii máttááttâm sämituojijd Sämikuávlu máttááttâskuávdáá já Aanaar aalmuglâšopâttuv ornim kuursâin. Lasseen sun lii nuurrâm tiäđu já kuuvijd moh lohtâseh anarâš tyejiärbivuáhán. Suu mielâst lii tehálâš et anarâštyeji sirdâšuvá puáttee suhâpuolváid já ovdán sii mield ovdâskulij. Ella Sarre lii jieijâs uásild aktijvâlávt sirdemin tyejiärbivyevi nuorâbáid tuájáráid.

Ella Sarre lii porgâm aktijvâlávt kulttuur já kielâ siäiludmân. Sun lii toimâm eres lasseen toimâtteijen Säämi radio anarâškielâlâš vuolgâttâsâi vuáháđuttem algâaaigijn, sehe toimâm ive 1987 vuáđudum Anarâškielâ seervi vuosmuu stiivrâ värisaavâjođetteijen.


Mervi Haavisto