Gánda ja Stállu

Muhtin gánda vulggii oktii meahccái vázzit. Son manai nu guhkás vuovddi sisa, ahte viimmat láhppui. De boahtá stállu ja áigu váldit gándda ja borrat.

Gánda: "It don daga munnje maidige dasgo mon lean hui gievra ja viissis."
Stállu: "Ihttin moai galge gávnnađit dán báikkis ja mon áiggon jearrat dus čiežanuppelohkái gažaldaga. Juos don it sáhte vástiđit, de don borrot."
Gánda: "Lehkos dasto nu."

Nuppi beaivve bođii gánda lihttosadjái, ja stállu lei jo doppe.
Stállu jearragođii ja gánda vastiđii.

Stállu: "Maid don dáhtut?"
Gánda: "Atte munnje heavvala!"
Stállu: "Maid don heavvaliin?"
Gánda: "Dávggi vuolan."
Stállu: "Maid don dávggiin?"
Gánda: "Gáranasa bážán."
Stállu: "Gos dat gáranas?"
Gánda: "Háikka geažis."
Stállu: "Gos dat háika?"
Gánda: "Ákšu dan čuohpai."
Stállu: "Gos dat ákšu?"
Gánda: " Geađgi dan nuorai."
Stállu: "Gos dat geađgi?"
Gánda: "Čearret dan njielai."
Stállu: "Gos dat čearret?"
Gánda: "Guliid bivdá."
Stállu: "Gos dat guolit?"
Gánda: "Jávrri botnis."
Stállu: "Gos dat jávri?"
Gánda: "Vuoksá dan jugai."
Stállu: "Gos dat vuoksá?"
Gánda: "Lávži dan buvihii."
Stállu: "Gos dat lávži?"
Gánda: "Čeavrris gáskkašii."
Stállu: "Gos dat čeavrris?"
Gánda: "Rovkui čáŋai."
Stállu: "Gos dat roavku?"
Gánda: "Beaivváš suddađii."
Stállu: "Gos dat beaivváš?"
Gánda: "Vári duohkái jávkkai."
Stallu: "Gos dat várri?"
Gánda: "Áhpái fierai."
Stállu: "Gos dat áhpi?"
Gánda: "Birra buot oppa máilmmi."

Stállu ii šat diehtán, maid son gálggašii jearrat. Dan dihtii son fertii vuolgit nuvttá eret ja guođđit gándda dasa.

Áppes 2. Giđđaáppes. Helena Valkeapää, Seija Guttorm & Aletta Ranttila. Stáhta prentehanguovddáš. Helsset 1987.